اسلام آباد۔9اگست (اے پی پی) سینیٹ پاکستان الیکٹرانک میڈیا ریگولیٹری اتھارٹی (ترمیمی) بل 2023 دی اتفاق رائے نال منظوری ݙے ݙتی اے۔ بدھ کوں سینیٹ دے اجلاس اچ وفاقی وزیر اطلاعات تے نشریات مریم اورنگزیب تحریک پیش کیتی جو پاکستان الیکٹرانک میڈیا ریگولیٹری اتھارٹی آرڈیننس 2002 اچ ٻئی ترمیم کرݨ دا بل پاکستان الیکٹرانک میڈیا ریگولیٹری اتھارٹی (ترمیمی) بل 2023 تے فوری غور کیتا وںجے۔ بل تے ڳالھ مہاڑ کریندیں ہوئیں وفاقی وزیر قانون تے انصاف سینیٹر اعظم نذیر تارڑ آکھیا جو صحافیاں دے ہک حلقے دے بل تے تحفظات ہن، باقی تنظیماں ایندی حمایت کیتی اے، صحافیاں دے ہک وݙے وفد جئیں اچ مختلف تنظیماں دے عہدیدار شامل ہن وزیراعظم نال ملاقات کیتی، ایں موقع تے کجھ وزیر وی موجود ہن۔ صحافتی تنظیماں دے عہدیداراں وزیراعظم کوں ݙسیا جو اے بل صحافتی برادرے کیتے اہم اے، صحافیاں بل دی منظوری کیتے پریس گیلری توں واک آؤٹ وی کیتا ہئی۔ وفاقی وزیر اطلاعات تے نشریات مریم اورنگزیب آکھیا جو اپریل 2022ء اچ پیمرا آرڈیننس اچ ترمیم کرݨ دا عمل شروع کر ݙتا ڳیا ہئی۔ ایندے اچ ٻہوں تبدیلیاں ضروری ہن۔ انہاں آکھیا جو اے پی این ایس، سی پی این ای، پی ایف یو جے، پی بی اے، ایمنڈ سودھے ساری میڈیا تنظیماں نال رل تے اے پراسس کیتا ڳئے۔ چیئرمین دی ہدایت تے وفاقی وزیر اطلاعات تے نشریات بل پیش کرݨ کیتے تحریک پیش کیتی جئیں دی منظوری دے بعد وفاقی وزیر اطلاعات تے نشریات مریم اورنگزیب پاکستان میڈیا ریگولیٹری اتھارٹی آرڈیننس 2002 اچ ترامیم پیش کیتی جئیں دی ایوان منظوری ݙے ݙتی اتے بل اتفاق رائے نال منظور کر ڳھدا ڳیا۔
