اسلام آباد۔21اگست (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو پہلی اقتصادی مردم شماری ہک وݙا سنگ میل اتے پاکستان دی ترقی دے رستے اچ ہک وݙا ستون اے جیڑھا پالیسی سازی، سرمایہ کاری، روزگار، مالی وسیلیں اتے سماجی خدمتاں سودھے سارے شعبیں اچ انقلاب گھن آوݨ دا سبب بݨ سڳدی اے، مردم شماری توں حاصل معلومات کوں استعمال اچ گھن آ تے اُڑان پاکستان دے وژن کوں اڳوں ودھاوݨ اتے 2035 تئیں ملکی معیشت کوں ہک ٹریلین ڈالر دی معیشت بݨاوݨ دے مقصد کوں حاصل کرݨ اچ مدد مِلسی، معاشی مردم شماری نال غیر رسمی شعبیں کوں معیشت دے مرکزی دھارے اچ گھن آوݨ، ایس ایم ایز کیتے پالیسی سازی اتے برآمدی گنجائش آلے اداریں کوں معاونت ݙیوݨ اچ مدد مِلسی۔ ملک دی پہلی اقتصادی مردم شماری دے اجراء دے موقع تے منعقدہ تقریب نال خطاب کریندیں وفاقی وزیر آکھیا جو اڄ پہلی اقتصادی مردم شماری جاری تھیندی پئی اے، اقتصادی منصوبہ بندی کیتے صحیح اتے حقائق تے مبنی اقتصادی ڈیٹا بنیادی لوڑھ اے کیوں جو ایں دی بنیاد تے پالیسی سازی تھیندی اے، بنگلہ دیش ہݨ تئیں تریجھی اتے ساݙے پڑوسی ملک 7 اقتصادی رائے شماری کر چکن، مستقبل دا دور مصنوعی ذہانت اتے ڈیجیٹل معیشت دا اے اتے ایں کیتے بنیادی بالن اتے خام مال ڈیٹا تھیندے۔” جے صحیح ڈیٹا موجود نہ ہووے تاں مصنوعی ذہانت وی آپݨا کم نئیں کر سڳدی، اساں کیتے اے ڳالھ چنڳی اے جو اڄ اساں ملک دی پہلی اقتصادی مردم شماری جاری کریندے پیوں جیں کیتے اساں پاکستان شماریاتی بیورو دی انتظامیہ اتے ٹیم، وزارت منصوبہ بندی، اتے ایں نال جڑیے ہوئے سارے لوکاں کوں مبارخ ݙیندن۔ وفاقی وزیر آکھیے جو “رائے شماری اچ 4 کروڑ سٹرکچرز (عمارتاں) دی جیو ٹیگینگ تھئی اے جیں کیتے سپارکو توں مدد حاصل کیتی ڳئی، ایں دے نال نال سیٹلائیٹ تصویراں نال ایں دی تصدیق وی جاری ہئی تاں جو زیادہ توں زیادہ قابل اعتبار معیار کوں یقینی بݨایا ونڄ سڳے۔ انہاں آکھیا جو رائے شماری نال پتہ لڳے جو 72 لکھ دے نیڑے ادارے معاشی یا معاشی سرگرمیاں نال جڑیے ہوئن، ہر ادارے کوں صنعتی کوڈ دے نال ریکارڈ کیتا ڳئے تاں جو پالیسی ساز اتے کاروباری طبقہ ایں توں فیدہ چا سڳے اتے ڈیٹا دی بنیاد تے فیصلے کرسڳے۔” ایں رائے شماری نال اساں کوں سائنسی بنیاداں تے منصوبہ بندی دیاں بنیاداں ملسن ۔ وفاقی وزیر آکھیا جو ایں رائے شماری صرف صنعتی و کاروباری اداریں تئیں محدود نئیں بلکہ گھریلو سطح تے تھیوݨ آلی معاشی سرگرمیاں دا احاطہ وی کریندی اے۔ “مردم شماری نال پتہ لڳے جو جو چار کروڑ عمارتاں اچوں ہک کروڑ ایجھے گھر ہن جیڑھے کہیں نہ کہیں شکل اچ معاشی سرگرمیاں نال منسلک ہن۔ایں نال ملک اچ نِکے اتے وچلے درجے دے کاروبار کوں ملک اچ ترقی ݙیوݨ اچ معلومات اتے مدد مِلسی۔اے معلومات تریمتاں دے معاشی کردار اتے انہاں کوں بااختیار بݨاوݨ اچ وی معاون اے کیوں جو ایں نال پتہ لڳے جو تریمتاں کیویں معاشی سرگرمیاں نال وابستہ ہن۔ایں نال تریمتاں کیتے بݨݨ آلے پروگراماں اتے منصوبیں کوں مقصد تے مبنی بݨاوݨ اچ مدد مِلسی۔ وفاقی وزیر آکھیا جو اقتصادی سروے اچ پتہ لڳے جو 72 لکھ اداریں وچوں 27 لکھ ادارے ریٹیل، ہک لکھ 88 ہزار ہول سیل دے کاروبار، 8 لکھ 25 ہزار ادارے مختلف خدمتاں اتے 23 ہزار فیکٹریاں پیداوار ݙیندیاں پئن ۔ایویں 6 لکھ 43 ہزار پیداواری یونٹس نِکے یونٹس پیداواری سرگرمیاں اچ مصروف عمل ہن۔ کل طور تے ݙٹھا ونڄے تاں کل 42.8 لکھ ادارے بݨدے پئن اتے جے سیکیورٹیز اینڈ ایکسچینج کمیشن نال ایں دا مقابلہ کیتا ونڄے تاں اتھاں کل 2.5 لکھ کمپنیاں ہن، ایں توں اندازہ تھیندے جو اقتصادی مردم شماری پاکستان کیتے کِتنے امکانات اتے موقع گھن تے آئی اے۔ایں نال پورے ملک دا اقتصادی منظر نامہ ساݙے سامݨے آئے۔
