راولپنڈی ۔9مئی(اے پی پی):پاک فوج دے اڳواݨ جنرل سید عاصم منیر آکھیے جو دشمن قوتاں اتے انہاں دے سرپرست کوڑ، جعلی خبراں اتے پروپیگنڈے نال ڈیجیٹل دہشت گردی، مسلح افواج اتے پاکستانی عوام وچال وانڄھ پیدا کرݨ دی کوشش کریندے پن ٻھل قوم دی حمایت نال انہاں قوتاں دے عزائم کوں ناکام ٻݨایا ویسی، 9 مئی منصوبے دے اصل اڳواݨ کوں اپݨے جرائم دا حساب ݙیوݨا ہوسی جو ایندے ثبوت موجود ہین، شہداء اتے انہاں دے ٹٻراں یا ادارے دی بے حرمتی کرݨ دی کہیں کوں اجازت نا ݙتی ویسی۔ آئی ایس پی آر آکھیے جو آرمی چیف جنرل سید عاصم منیر لاہور گیریژن دا دورہ کیتے اتے اتھاں یادگار شہداء تے پھلاں دی چادر چڑھائی۔ آرمی چیف کوں فارمیشن دیاں آپریشنل تیاریاں تے تفصیلی بریفنگ وی ݙتی گئی۔ کور ہیڈ کوارٹرز اچ گیریژن آفیسرز نال خطاب اچ آرمی چیف افسران اتے جواناں کوں قوم کیتے خدمتاں اتے پیشہ ورانہ مہارت تے خراج تحسین پیش کیتے۔ آرمی چیف آکھیا جو پاک فوج دا ہر سپاہی اتے افسر کہیں وی ٻئی ترجیح دے بغیر اپݨے فرائض اتے ذمہ داریاں کوں اڳونہا رکھیندے اتے روزانہ قربانیاں ݙیندا پئے، 9 مئی پاکستان دی تاریخ اچ ہک سیاہ ݙینھ راہسی ڄݙاں ڄاݨ ٻڄھ تے شہداء دیاں یادگاراں دی بے حرمتی کریندے ریاست اتے قومی اتحاد دیاں علامتاں تے حملہ کیتا ڳئے، ایں سانڳے پاکستان دے دشمناں کوں ریاست اتے قوم دا مذاق اݙاوݨ دا موقع ملیے، ہݨ اوھے سازشی عناصر، ڈھٹائی نال بیانیہ کوں تروڑ مروڑ تے ریاست کوں ایں مذموم کوشش اچ ملوث کرݨ اچ ردھے ہوئن، اینڄھے عناصر نال نا کوئی سمجھوتہ تھی سڳدے نا ڈیل۔۔۔ ایں جرم دا حساب ݙیوݨا پوسی۔ انہاں آکھیا جو ایں معاملے تے روز آوݨ آلیاں سازشاں، اشتعال انگیزیاں دا ولدا نا ݙیوݨ کوں ساݙی کمزوری نا سمڄھیا ونڄے۔ آرمی چیف لاہور گیریژن اچ جناح لائبریری دا وی افتتاح کیتے۔
